Würdigung Fritz Jampen
Sehr gärn säge ig im Name vom Posunechor Zäziwil es paar Wort zur Würdigung vom
Fritz Jampen.
Vo jung a het ds Musig mache zum Läbe vom Fritz ghört.
Agfaneh et sini Begeisterig für dPosunechormusig scho ds Müntschemir.
Vo 1962 bis 2004 isch dr Fritz de Aktivmitglied gsi bi üs im Posunechor Zäziwill.
Das si 42 Jahr!
Är säuber het usgrächnet, dass är öppe 3000x füre Posunechor a Probe u Aläss usgrückt isch u drbi rund 25’000 Autokilometer zrügggleit het.
Mänggisch het auso ds Käthi dr Fritz müesse la ga, für dass är sim Hobby het chönne
frööne – oder me cha o säge, für sim Gott zdiene, wüu dr Uftrag vo üsem Posunechor isches, Musig zur Ehr vo Gott u zur Fröid vo de Mönsche zmache.
Vili Jahr het dr Fritz sim Euphonium chreftegi u sicheri Tön entlockt u isch dermit ä
wichtegi Stützi i däm Register gsi!
Wo Fritz im 2004 sis Instrumänt het la rueje, het das ä Lücke gä...
Vo ganzem Härze bi ig pärsönlech froh u dankbar, dass är mit em Ustritt aus Aktivmitglied aber nid eifach aues het a Nagu ghäicht.
Är isch Passivmitglied worde – u i wages zbhoupte, är isch ds aktivschte Passivmitglied vom Posunechor Zäziwill vo aune Ziite gsi!
Mit grossem Ifer u Isatz het sech dr Fritz wiiterhin drum bemüeit, dass dr Posunechor Zäziwill nid i Vergässeheit gratet.
Über vili Jahr hani äuä bau wüchentlech es Couvert vo ihm uf dr Poscht übercho, wo är mir Adrässänderige vo Lüt us üsere Adrässkartei het gschickt u geng si o no es paar Vorschleg drbi gsi, vo Lüt, wo är gärn nöi het wöuä i üsi Kartei ufnäh.
Drzue het är de fasch zu aune o no gwüsst es Gschichtli zverzeue, wenn dass si Geburtstag hei u wenn Hochzytstag, etc.
Ungloublech, wieviu Lüt dr Fritz landuf, landab het kennt!
2x im Jahr isch dr Fritz mit emne säuber bachne Öpfuchueche bi mir im Büro uftoucht
u de heimer zäme die Adrässe gründlech düregstrählt.
Irgendeinisch hanig de agfange, bi dene Adrässe, wo är mir nöii het gmäudet, es FJ
derzue zschriebe.
Aktuell hei mir i üsere Kartei öpis über 900 Adrässe u bi haargenau jeder dritte Adrässe steit FJ derbi! 313 x!!! Tatsächlech wäres sicher no dutzendi, we nid hunderti meh, wüu ig di Bemerkig ja nid vo Afang a ha derzue ta.
I darf würklech säge, dass dr Fritz Jampen massgäblech derzue biitreit, dass mir 5x pro Jahr üser Jahreskonzärt dörfe vor voue Konzärtsääl spiele!
Nidemau sini Blindheit het ihn drann ghinderet, üsem Verein wiiter zdiene!
Di letschti gmeinsami u abschliessendi Adräss-aktion het das Jahr am 9. Oktober stattgfunge!
Mir si di Adrässlischte es letschts mau düregange u när het är mir se zrügggä.
I gloube, die säubergwählti Ufgab isch für ihn jahrezähntelang ä Luscht gsi, aber denn het ihn das Abgä vo dere Ufgab richtig erliechteret. Für si letscht Wäg chönne zga, isch es ihm sehr wichtig gsi, aues wougordnet zhingerla.
Ig pärsönlech wirde dr Fritz ganz fescht vermisse, weni über dene vilne Adrässe brüete u niemerem meh cha frage.
Mir aui vom Posunechor si em Fritz fescht dankbar für sis jahrzähnte lange Würke für üse Verein u mir si sehr berühert, dass är üs no bis über ä Tod wott stütze u sterche, i däm dass dTruurspände a üs gö. Mir danke ihm u de Aghörige vo ganzem Härze!
U mir wärde dr Fritz gärn i würdiger Erinnerig bhaute.
Du grosser Gott, wenn ich die Welt betrachte, die du geschaffen, durch dein Allmachtswort, dann jauchzt mein Herz dir grosser Herrscher zu, wie gross bist du, wie gross bist du!
Dr Fritz het sech gwünscht, dass mir das Loblied a sire Beärdigung spiele.
Sehr gärn tüe mir das u dir dörft gärn mit istimme i das Lob a dä Schöpfer, wo dr Fritz mit vilne Begabige beschänkt het u ihn itz het zu sich grüeft.
AnnKathrin Eggimann